E lu curaggiu sia vostru Signuri - di Euranio La Spisa

Ê quattru venti la me vuci vola,
accortu chiamu tutti li me figghi,
è l'ura chi dû sonnu l'arruspigghi
picchì lu cori miu nun si cunzola.

Supra lu Sacru solu, pedi infami
senza pietà la morti ni purtaru,
lu sangu dî 'nnuccenti lu virsaru,
genti scannaru comu lu vistiami.

" Curriti figghi me' senza spaventu,
'ntre vini vostri nun ni curri scantu,
'u sangu friddu sia Vostru Signuri,
'ccussì a li Patri vostri fati onuri.

" Chi sia di li liuni 'a vostra forza,
a lu nimicu nostru dati assartu,
luttati 'n menzu a lu campu apertu,
ca libirtà pirduta mi si smorza.

Palermu, Cunigghiuni lu pittaru
di dui culuri lu Sacru Labàru,
giallu e russu comu focu veru,
mora, mora, mora a lu straneru!

Euranio La Spisa@