L'ASSALTU. - di Euranio La Spisa

Lu tammurinu sona, nun vi firmati,
batti lu tempu so, pi avanzari
'n menzu lu focu di li cannunati,
l'ultimu assaltu dda s'avi a purtari.
Forza picciotti, 'a vittoria é nostra,
l'ultimu sforzu, poi n'arripusamu
'ccussì ni mittemu tutti 'n mostra,
chi lu nimicu è vintu, ci spiramu!
E tu cumpagnu miu portabbannera,
si si' firutu, passala a mia tranquillu,
pi gloria nostra e di la nostra Terra,
lu portu avanti jò lu Gran Vissillu!
Oh maliritta guerra e morti 'nfami!
Ti sta purtannu li chiù beddi ciuri,
puru si tanti picciotti pateru 'a fami,
ora a li matri ci livasti li so' amuri.
Ormai corpa assai n'àiu pigghiatu
e puru si lu sangu scurri a ogni 'gnuni,
ancora pi gridari n'àiu di ciatu:
Viva 'a Patria me' e 'u Re Burbuni!

Euranio La Spisa@