LI VICCHIAREDDI - di Euranio La Spisa
06.04.2014 12:31
Li trovi sempri dda , li vicchiareddi
vigghianti sunnu, supra li panchini,
accumpagnati di li vastuneddi
parinu tanti ciuri ntê jardini.
Caminanu a passu lentu , lentu
comu li fogghi sicchi su' trimanti,
ci fu un jornu chi foru pussenti
e di la giuvintù facianu vantu .
Festa ni fannu si li salutamu
quannu quarchi parola ci spiamu,
ci ridinu 'ddi occhi spirlucenti
ni strincinu li manu ,su' cuntenti.
Li vicchiareddi ànnu la mimoria
su' li casciuna di la nostra storia ,
e comu si ntô specchiu ni taliàmu
si voli Diu, e a longu ci campàmu .
Euranio La Spisa©