VULISSI - di Matilde Messina

Vulissi na casuzza nica, nica
cu 'mpratu cu l'erbuzza
sempri virdi , cu tanti ciuri
margheriti , papaviri e acitazzi,
ddi ciuri di muntagna frischi ,frischi ...
ca ogni matina spuntunu all'intrasatta

'na casuzza ccu' 'nà scalinata
di rosa sicilianu culurata !!
ammenzu a lu disertu fattu i lava
li pini , li peri di chiuppu, li castagna
li pira e... li meli di muntagna...

a matina versu l'agghiunnata ,
vulissi, taliari l 'aurora
e a la sira versu l'ascurata ...
vulissi sentiri lu ventu i tramuntata
u suli ca si cucca ,fra li munti,
u giallu cà culura li tramunti
poi avviarimi versu l'arrizzittata
capiri cà 'n autra iurnata è passata.

Matilde Messina@